ԿԱՄՔ-ը Գյումրիում իրականցրեց ,,Երիտասարդների մասնակցությունը տեղական ինքնակառավարմանը նոր մեդիայի միջոցով,, ծրագիրը
ՀՀ տարվա երիտասարդական մայրաքաղաք Գյումրիում ավարտվեց «Երիտասարդների մասնակցությունը տեղական ինքնակառավարմանը նոր մեդիայի միջոցով» ծրագիրը, որն իրականացնում էր «ԿԱՄՔ» Լոռվա երիտասարդական ծրագրերի կենտրոն» հասարակական կազմակերպությունը՝ ՀՀ սպորտի և երիտասարդության հարցերի նախարարության աջակցությամբ: 
Ծրագրի շրջանակներում նոյեմբերի տասնյոթից քսանը Գյումրիի «Բեռլին Արտ հյուրերի տանը» անցկացվեց խտացված մեդիա դասընթաց, որին մասնակցում էին գյումրեցի քսանհինգ երիտասարդ, ովքեր ունեն հետաքրքրություն տեղական ինքնակառավարման և մեդիա ոլորտի նկատմամբ:
Քառօրյա դասընթացի ընթացքում ծրագրի դասընթացավարը և հրավիրված մեդիա և ՏԻՄ ոլորտի փորձագետները, համադրելով կրթության ֆորմալ և ոչ ֆորմալ մեթոդները, երիտասարդներին փոխանցեցին գիտելիքներ «Տեղական ինքակառավարման մասին» ՀՀ օրենքում ամրագրված հրապարակայնության և թափանցիկության հիմունքների, մասնակցային կառավարման կարգի, հանրագիր իրականացնելու մեխանիզմների, նոր մեդիայի, քաղաքացիական լրագրության և բլոգավարության հիմունքների վերաբերյալ։ Մասնակիցները ձեռք բերեցին հանրագիր իրականացնելու, տեղական ինքնակառավարմանը մասնակցելու, գրավոր և բանավոր տեղեկատվություն ստանալու, ինչպես նաև լրագրողական հարացազրույց վարելու, լրատվական հոդված և ակնարկ գրելու, լուրը գովազդից և փիարից տարբերակելու, ճիշտ լուսանկարելու, բլոգ բացելու և այն վարելու գիտելիքներ ու հմտություններ: 
Դասընթացի մասնակիցները հնարավորություն ստացան նաև իրականացնելու իրենց լրագրողական առաջին պրակտիկան: Ծրագրի շրջանակներում նրանք այցելեցին Գյումրիի քաղաքապետարան, հարցազրույցներ վարեցին ՏԻՄ ներկայացուցիչների հետ, և պատրաստելով առաջին հոդվածները, տեղադրեցին ծրագրի շրջանակներում բացված «ԳԵԼԱ՝ Գյումրու երիտասարդ լրագրողների ակումբ» բլոգում (բլոգի հղումը՝ http://gyumrigela.blogspot.am/): Դասընթացը հաջողությամբ ավարտած մասնակիցներն ստացան հավաստագրեր, ինչպես նաև հնարավորություն՝ մասնակցելու ծրագրի վերաբերյալ պատրաստվող տեսաֆիլմի նկարահանման աշխատանքներին: Ծրագրի ավարտին բացի վերոնշյալ ընդհանուր մեդիա բլոգից, որտեղ տեղադրվելու են մասնակիցների պատրաստած նյութերը համայնքի մասին և որը վարելու հնարավորություն ունեն ծրագրի բոլոր մասնակիցները, շահառուներից մի քանիսը, ելնելով իրենց նախասիրություններից և հետաքրքություններից, արդեն ստեղծել էին իրենց անհատական բլոգները, ինչն անշուշտ վկայում է դասընթացի հաջողվածության մասին:
Ծրագրի շահառուներից Հասմիկ Հակոբյանը նշում է, որ դասընթացի արդյունքները գերազանցեցին իր ակնկալիքները.
-Ես արդեն գիտեմ, թե ինչ է նոր մեդիան, ինչպես պետք է գրել ինտերնետային հոդված, ավելին՝ արդեն բացել եմ իմ առաջին բլոգը, որը վերաբերում է ստոմատոլոգիային, քանի որ մասնագիտությամբ ատամնաբույժ եմ և նպատակ ունեմ զարգացնել այն: Սա իր տեսակի մեջ յուրահատուկ դասընթաց էր, որը երիտասարդներին տալիս է ոչ միայն գիտելիքներ, այլ նաև աշխատանք գտնելու և որոշ առումով երիտասարդների զբաղվածության խնդիրը մեղմացնելու հնարավորություն, քանի որ ստանալով լրագրողական գիտելիքներ ու հմտություններ՝ մենք կարող ենք թղթակցել տարբեր կայքերի ու թերթերի:
Լուսանկարիչ Լևոն Միրզախանյանն էլ ստեղծել է ֆոտոբլոգ, որտեղ նպատակ ունի տեղադրել իր և եղբոր լուսանկարած Գյումրու տեսարժան վայրերը և այլ հետաքրքիր լուսանկարներ՝ մի կողմից հանրությանը և տուրիստներին ներկայացնելով Գյումրու կոլորիտն ու գեղեցկությունը, մյուս կողմից՝ նպաստելով իրենց լուսանկարչական ծառայությունների փիարին:
Ծրագրի շրջանակներում «ԿԱՄՔ» Լոռվա երիտասարդական ծրագրերի կենտրոն» ՀԿ-ն համագործակցում էր Գյումրու քաղաքապետարանի, Գյումրիի Երիտասարդական պալատ ՀՈԱԿ-ի, Գյումրիի «Ինֆոտուն» և այլ երիատասարդական-հասարակական կազմակերպությունների հետ: Գյումրու քաղաքապետարանի մշակույթի և երիտասարդության բաժնի պետ Ա. Մկրտչյանն կարևորում է նման ծրագրերի դերը ՏԻՄ-երիտասարդություն փոխհարաբերությունների ամրապնդման տեսանկյունից.
-Այս ծրագիրը կարծես թե մի միջոց է, ծրագրի մասանկից երիտասարդների առջև բացելու քաղաքպետարանի դռները, կոտրելու այն կարծրատիպը, որ դռներից այն կողմ նստած են «չինովնիկներ», «գալստուկով դյադյաներ»: Նրանք այսօր եկան, զրուցեցին իրենց հետաքրքրող հարցերի շուրջ, հասկացան, որ այստեղ նստած են հասարակ մարդիկ, ովքեր մտահոգ են համայնքի խնդիրներով և ևս կարիք ունեն երիտասարդների հետ շփման ու համագործակցության:
Գյումրու երիտասարդական պալատի տնօրեն Լիլիթ Մակարյանն աշխատանքի բերումով շատ է շփվում գյումրեցի ակտիվ երիտասարդների հետ: Նրա կարծիքով ծրագիրը կարողացել է ապահովել լայն մասնակցություն՝ ընգրկելով գյումրեցի ոչ միայն ակտիվ, այլ նաև պասիվ երիտասարդների.
-Ինձ համար ուրախալի էր ծրագրի մասնակիցների մեջ տեսնել նաև երիտասարդների, որոնց նախկինում չէի տեսել այլ երիտասարդական միջոցառումների ու ծրագրերի մասնակցելիս, սա խոսում է այն մասին, որ ծրագիրն իրոք հասել է իր նպատակին՝ նպաստելով գյումրեցի ոչ այնքան ակտիվ երիտասարդների ներգրավմանը հասարակական կյանքին, տեղական ինքնակառավարման գործընթացին:
«Երիտասարդների մասնակցությունը տեղական ինքնակառավարմանը նոր մեդիայի միջոցով» ծրագրի նպատակն է՝ նպաստել շահառու երիտասարդների անհատական և սոցիալական զարգացմանը, մասնակցային կառավարման վերաբերյալ իրազեկվածության մակարդակի բարձրացմանը և նոր մեդիայի վերաբերյալ գիտելիքներ ու հմտություններ փոխանցելու միջոցով նրանց ներգրավվածությանը համայնքային կյանքին ու տեղական ինքնակառավարման գործընթացին: Ծրագիրը նպատակ ունի նաև խթանել երիտասարդների մասնագիտական կողմնորոշմանը և քաղաքացիական լրագրողների պատրաստման միջոցով ՏԻՄ- երիտասարդություն հաղորդակցման որակի բարելավմանը:
«ԿԱՄՔ» Լոռվա երիտասարդական ծրագրերի կենտրոն» ՀԿ փոխնախագահ, ծրագրի ղեկավար Պետրոս Պետրոսյանի հավաստմամբ՝ ծրագրի նպատակը բխում է ՀՀ երիտասարդական պետական քաղաքականության 2013-2017թ.թ. ռազմավարության գերակա ուղություններից և ՀԿ-ի համար ևս ունի ռազմավարական նշանակություն, քանի որ «ԿԱՄՔ» Լոռվա երիտասարդական ծրագրերի կենտրոն» ՀԿ-ի առաքելությունն է` նպաստել երիտասարդների դերի բարձացմանը, ներգրավմանը երկրկի հասարակական-քաղաքական, սոցիալ-տնեսական, հոգևոր-մշակութային ոլորտներում: Նա նշեց, ծրագիրն ունի շարունակական բնույթ և նմանատիպ ծրագիր անցած տարի իրականացվել է նաև ՀՀ երկրորդ երիտասարդական մայրաքաղաք Ստեփանավանում՝ նպաստելով ստեփանավանցի երիտասարդների ակտիվ ներգրավմանը համայնքային կյանքին և տեղական ինքնակառավարմանը:
Комментарии
Отправить комментарий