Լոռու մարզում ավարտվեց «Լոռեցի երիտասարդները՝ մեդիագրագիտության համայնքային դեսպաններ» հինգամսյա նախագիծը, որն իրականացվել է 2024թ. ապրիլ-օգոստոս ամիսներին Ստեփանավան, Գյուլագարակ և Լոռի Բերդ խոշորացված համայնքներում:
Նախագծի անմիջական շահառու են եղել նշված համայնքներից ընտրված 15-30 տարեկան 60 երիտասարդ, որոնք ծրագրի առաջին փուլում մասնակցել են մեդիագրագիտության և թվային գրագիտության կարողությունների զարգացման երկօրյա դասընթացների, սովորել պաշտպանվել թվային միջավայրում հանդիպող կիբեռվտանգներից ու մեդիամանիպուլյացիաներից, ստուգել փաստերը, տարբերակել կեղծ և հավաստի աղբյուրները, ինքնուրույն կողմնորոշվել արագ փոփոխվող թվային միջավայրում՝ չդառնալով կիբեռհանցագործությունների ու ապատեղեկատվության զոհ:
Ծրագրի 2-րդ փուլում նրանցից լավագույններն ընտրվել են որպես մեդիագրագիտության համայնքային դեսպաններ և զարգացրել տեղեկատվական արշավներ, սեմինար-քննարկումներ վարելու հմտություններ, ապա դասընթացի ընթացքում ստացած գիտելիքները տարածել իրենց համայնքներում՝ թվային և ոչ թվային միջավայրներում:
Ոչ թվային միջավայրում՝ շահառու համայնքների մի շարք դպրոցներում, կազմակերպվել են տեղեկատվական հանդիպումներ և բաց դասեր 13-18 տարեկան դպրոցականների, ինչպես նաև նրանց ծնողների, ուսուցիչների համար: Այս փուլին մասնակցել են Գյուլագարակ, Ստեփանավան և Լոռի Բերդ խոշորացված համայնքներից շուրջ 350 բնակիչ, որոնք հաղորդակից են դարձել մեդիագրագիտության, կիբեռգրագիտության առանցքային հարցերին:
Թվային միջավայրում նախագծի շահառու երիտասարդները մեդիագրագիտության վերաբերյալ ստացած գիտելիքները տարածել են մեդիաչելենջ տեսանյութերի միջոցով, անցկացվել է «Ես_մեդիագրագետ_եմ» խորագրով #մեդիաչելենջ տեսանյութերի մրցույթ, որի շրջանակում երիտասարդները սմարթֆոններով նկարել և ֆեյսբուքում տեղադրել են տեսանյութեր, որոնց միջոցով համացանցում գրագետ և պաշտպանված լինելու վերաբերյալ ուղերձներ են հղում թվային միջավայրի իրենց ընկերներին, հետևորդներին և մարտահրավերը փոխանցում նրանց:
Նախագծի շահառու երիտասարդ մեդիադեսպանների ներգրավմամբ պատրաստվել է «Լինենք մեդիագրագետ, և օրը բարի կբացվի» խորագրով ուսումնական տեսահոլովակ, որի QR կոդով պատրաստվել են «Մեդիագրագետ-խոսող-շոկոլադներ» և մեդիագրագիտության համայնքային դեսպանների միջոցով բաժանվել թիրախ համայնքների բնակիչներին` նպաստելով մեդիագրագիտության տարածմանն իրենց համայնքներում:
Նախագծի ավարտին անց է կացվել «Մեդիամարտ» ինտելեկտուալ խաղ-մրցույթ, որին մասնակցել են ծրագրում ներգավված դպրոցների երիտասարդներից կազմավորված ութ թիմ: Կուրթան, Վարդաբլուր, Գյուլագարակ, Հոբարձի, Կաթնաղբյուր, Լեջան, Սվերդլով և Ստեփանավանի թիվ վեց դպրոցների մեդիադեսպանների թեժ պայքարում հաղթող ճանաչվեց Ստեփանավանի Վահան Թեքեյանի անվան թիվ վեց դպրոցի թիմը: «Մեդիամարտ»-ը նպատակ ուներ ոչ միայն աշակերտներին ծանոթացնել բրեյն-ռինգ խաղի ձևաչափին և ձևավորել թիմային պայքարի ոգի, այլ նաև ամրապնդել մեդիագրագիտության վերաբերյալ ծրագրի նախորդ փուլերի ընթացքում երիտասարդների ստացած գիտելիքները:
Ծրագրի ավարտին կազմակերպված ամփոփիչ միջոցառման ընթացքում ներկայացվեցին հինգամսյա նախագծի ընթացքում ունեցած արդյունքներն ու ձեռքբերումները, մեդիագրագիտության կարողությունների զարգացման դասընթացները հաջողությամբ ավարտած երիտասարդները ստացան մեդիագրագիտության համայնքային դեսպանի կոչում և հավաստագիր: Ամփոփվեց նաև «Ես_մեդիագրագետ_եմ» #մեդիաչելենջ տեսանյութերի մրցույթը, տարբեր անվանակարգերում հաղթող ճանաչված երիտասարդները ստացան խրախուսական մրցանակներ:
Ինչպես նշում է ծրագրի մեդիափորձագետ, «ԿԱՄՔ» Լոռվա երիտասարդական ծրագրերի կենտրոն» ՀԿ նախագահ Նազելի Ավագյանը, «Լոռեցի երիտասարդները՝ մեդիագրագիտության համայնքային դեսպաններ» նախագծի շնորհիվ Լոռու մարզի Ստեփանավան, Լոռի Բերդ, Գյուլագարակ համայնքներում ունենք մեդիագրագիտության դեսպաններ, որոնք իրենց գործունեությամբ ծրագրի ավարտից հետո ևս կշարունակեն նպաստել թվային և ոչ թվային միջավայրում մեդիագրագիտության և կիբեռգրագիտության վերաբերյալ տեղեկատվության տարածմանը, ինչն էլ կնվազեցնի մեդիամանիպուլյացիաների, կիբեռհանցագործությունների ենթարկման վտանգի մակարդակը թիրախ համայնքների բնակիչների շրջանում, որն էլ այս նախագծի հիմնական նպատակն էր»:
«Լոռեցի երիտասարդները՝ մեդիագրագիտության համայնքային դեսպաններ» ենթադրամաշնորհային նախագիծն իրականացվել է «ԿԱՄՔ» Լոռվա երիտասարդական ծրագրերի կենտրոն» ՀԿ-ի կողմից «Երիտասարդները գործելիս. Հայաստանում երիտասարդների զորեղացման և առաջնորդության խթանման» ծրագրի շրջանակում:
«Երիտասարդները գործելիս. Հայաստանում երիտասարդների զորեղացման և առաջնորդության խթանման» ծրագիրը Եվրոպական միության և Կոնրադ Ադենաուեր հիմնադրամի կողմից ֆինանսավորվող նախաձեռնություն է, որն իրականացվում է Վորլդ Վիժն Հայաստանի, Մեդիա նախաձեռնությունների կենտրոնի և Գյումրու «Երիտասարդական նախաձեռնությունների կենտրոն»-ի հետ համատեղ:
Комментарии
Отправить комментарий