«Լոռեցի երիտասարդները՝ բարենպաստ կլիմայի էկոդեսպաններ» աշնանային էկոդպրոց-ճամբարի մասնակցության հրավեր
- Լոռու մարզի Ստեփանավան և Գյուլագարակ խոշորացված համայնքների դպրոցներում սովորող,
- բնապահպանությամբ, շրջակա միջավայրով և կլիմայի փոփոխությամբ հետաքրքրված
- 14-18 տարեկան սիրելի՛ աշակերտներ,
«ԿԱՄՔ» Լոռվա երիտասարդական ծրագրերի կենտրոն» ՀԿ-ն աշնանային արձակուրդներին հրավիրում է մասնակցելու «Լոռեցի երիտասարդները՝ բարենպաստ կլիմայի էկոդեսպաններ» աշնանային էկոդպրոց-ճամբարի, որի շնորհիվ կձևավորես էկովարքագիծ, կստանաս օգտակար գիտելիքներ ոչ միայն քո, ընտանիքիդ ու շրջապատիդ, այլև Երկիր մոլորակի համար:
Աշնանային էկոդպրոց-ճամբարի մասնակիցները կիրազեկվեն կլիմայի փոփոխության հետևանքով Երկիր մոլորակին ու մարդկանց սպառնացող վտանգների մասին, կիմանան ինչ անել կամ չանել, որպեսզի նվազեցնեն մարդու գործունեության բացասական ազդեցությունը մոլորակի և կլիմայի փոփոխության վրա՝ դառնալով իրենց շրջապատում բարենպաստ կլիմայի էկոդեսպաններ և կյանքի կոչելով կանաչ նախաձեռնություններ:
«Լոռեցի երիտասարդները՝ բարենպաստ կլիմայի էկոդեսպաններ» աշնանային էկոդպրոց-ճամբարը ներառում է՝
- ոչ ֆորմալ բնույթի երկօրյա տեսական դասընթացներ և գործնական վարժանքներ,
- այցելություն Հայաստանի ազգային ագրարային համալսարանի Վանաձորի մասնաճյուղ,
- էկոարշավ-էքսկուրսիաներ,
- ինտելեկտուալ խաղեր,
- «Էկոչելենջ» և այլ մրցույթներ,
- տեսահոլովակների նկարահանում,
- տեղեկատվական էկո վահանակների պատրաստում,
- ծառատունկ…
Ծրագիրը կմեկնարկի դասընթացների փուլով, որը տեղի կունենա hոկտեմբերի 21-22-ին Ստեփանավանի թիվ 6 միջնակարգ դպրոցում (հասցեն` քաղաք Ստեփանավան, Ձախափնյա թաղամաս, Սուրբ Վարդանի 1 ): Այն կվարեն Հայաստանի ազգային ագրարային համալսարանի դասախոս-դասընթացավարները: Հոկտեմբերի 23-ին ծրագրում ընտրված աշակերտները հնարավորություն կունենան գործնական պարապմունքների մասնակցել Հայաստանի ազգային ագրարային համալսարանի Վանաձորի մասնաճյուղում՝ ստանալով նաև մասնագիտական կողմնորոշում:
Ծրագրի հետագա փուլերի մասին կիրազկվեն դասընթացները հաջողությամբ ավարտած երիտասարդներն ու պատանիները, որոնք կստանան հավաստագրեր եւ «Համայնքի երիտասարդ էկոդեսպան» կոչում:
Ծրագրին մասնակցելու համար հարկավոր է մինչև սույն թվականի հոկտեմբեր 18-ը՝ ժամը 24:00-ն, լրացնել դասընթացի մասնակցության հայտադիմումը: Մասնակցությունն անվճար է, տեղերը՝ սահմանափակ: Ընտրությունը կկատարվի հայտադիմումների հիման վրա, կտեղեկացվեն միայն ընտրված մասնակիցները: Ծրագիրը հոգում է մասնակիցների ուղևորափոխադրման և սննդի ծախսերը: Խրախուսվում է Արցախից բռնի տեղահանված աշակերտների, ինչպես նաև դպրոցների կենսաբանության, բնապահպանության երիտասարդ մասնագետների ներգրավումը ծրագրին:
Լրացուցիչ տեղեկությունների համար կարող եք զանգահարել 093-40-50-82 , 077392814 հեռախոսահամարներով կամ գրել loreciecodespanner@gmail.com էլեկտրոնային փոստի հասցեին:
«Լոռեցի երիտասարդները՝ բարենպաստ կլիմայի էկոդեսպաններ» ծրագիրն իրականացվում է «Երիտասարդները հանուն բարենպաստ կլիմայի» ծրագրով տրամադրած ենթադրամաշնորհային բաղադրիչի շրջանակում, որն իրականացվում է «Դիլիջանի երիտասարդների համագործակցության կենտրոն» ՀԿ-ի կողմից ՅՈՒՆԻՍԵՖ-ի հետ համագործակցությամբ։
«Երիտասարդները հանուն բարենպաստ կլիմայի» ծրագիրը իրականացվում է Ավստրիական զարգացման (ԱԶԳ) ֆինանսավորմամբ ՅՈՒՆԻՍԵՖ-ի կողմից՝ ՀՀ շրջակա միջավայրի, տարածքային կառավարման և ենթակառուցվածքների, Կրթության, գիտության, մշակույթի և սպորտի նախարարությունների հետ համագործակցությամբ։
*** Ծրագրի արդիականությունն ու կարևորությունը
Վերջին մի քանի տասնամյակների ընթացքում Կլիմայի փոփոխության վտանագավոր ազդեցությունները զգացվում են ողջ աշխարհում՝ գլոբալ տաքացում, միջավայրի անապատացում, անտառների ոչնցացում, ջրային ռեսուրսների նվազում, բույսերի և կենդանիների բազմաթիվ տեսակների անհետացում, սննդամթերքի աղտոտում, հիվանդությունների առաջացում, ինչը սպառնալիք է Երկիր մոլորակի գոյությանը: Այս ամենը նաև մարդու գործունեության հետևանք է: Կլիմայի փոփոխությունից տուժում է նաև մարդը, իսկ ամենից շատ՝ երեխաներն ու երիտասարդները, քանի որ ապագայում հենց նրանք են կրելու դրա հետևանքներն ու վնասները: Այդ իսկ պատճառով կարևոր է երիտասարդների ու երեխաների ներգրավումը կլիմայի փոփոխման մեղմմանն ուղղված գործողություններում:
Եթե կլիմայի փոփոխության պատճառը հիմնականում մարդն է՝ իր գործունեությամբ, հետևաբար խնդրի լուծողը նույնպես մարդն է, որը, իրազեկվելով հիմնախնդրի, դրա վտանգերի մասին և վերանայելով իր վարքագիծը, կարող է պայքարել հանուն բարենպաստ կլիմայի՝ նվազեցնելով իր էկոլոգիական հետքը մոլորակի վրա և «փրկելով իր բաժին մոլորակը փլուզումից»:
Հաշվի առնելով այս ամենը՝ «ԿԱՄՔ» Լոռվա երիտասարդական ծրագրերի կենտրոն» ՀԿ-ն Լոռու մարզի Գյուլագարակ և Ստեփանավան խոշորացված համայնքներում իրականացնում է «Լոռեցի երիտասարդները՝ բարենպաստ կլիմայի էկոդեսպաններ» նախագիծը, որի նպատակն է՝ նպաստել շահառու համայնքներում կլիմայի փոփոխության վերաբերյալ 60 երիտասարդի իրազեկվածության մակարդակի բարձրացմանը և կազմավորելով երիտասարդ էկոդեսպանների հանրույթ՝ նրանց միջոցով շահառու համայնքներում (օնլայն և օֆլայն տիրույթներում) խթանել կլիմայի փոփոխության և դրա հետևաքների մեղմման վերաբերյալ տեղեկատվության տարածմանը, էկովարքագծի ձևավորմանն ու կանաչ նախաձեռնությունների իրականացմանը:
Комментарии
Отправить комментарий